Молитва ко Пресвятой Богородице пред иконою «Нечаянная Радость» о счастье семьи

Кондак 12

Благодать Божественную испроси нам у Сына Твоего и Бога, простри нам руку помощи, отжени от нас всякаго врага и супо-стата, умири нашу жизнь, да не погибнем люте, без покаяния, но приими нас в вечныя кровы, Богородительнице, да радующеся поем Богу, Тобою нас спасающему: Аллилуиа.

Икос 12

Поюще неизреченное матернее Твое милосердие к человеку беззаконну, восхваляем Тя вси, яко твердую Предстательницу за нас, грешных, и покланяемся Тебе, о нас молящейся; веруем бо и уповаем, яко испросиши у Сына Твоего и Бога благая временная и вечная всем, с любовию вопиющим Ти сице: Радуйся, всех наветов и искушений, от мира, плоти и диавола находящих, попрание; Радуйся, нечаемое примирение ожесточенно враждующих. Радуйся, недоведомое исправление нераскаянных грешников; Радуйся, изнемогающих от уныния и печали скорая Утешительнице. Радуйся, благодатию смирения и терпения нас снабдевающая; Радуйся, клятвопреступлений и неправедных стяжаний всенародное обличение. Радуйся, от домашния брани и вражды единокровныя миром и любовию ограждающая; Радуйся, от пагубных начинаний и несмысленных пожеланий нас незримо отвращающая. Радуйся, во благих намерениих наших присная Споспешнице; Радуйся, в час кончины всем нам Помощнице. Радуйся, нечаянную радость верным дарующая.